[博讯网:新闻、文集、论坛,是留学生创办的自由综合新闻网] .

黄之锋:林郑月娥,眼不见为净既处事心态只会引火自焚!
(博讯2015年02月11日发表)

    
    今年算大规模既落区追击行动,虽然公民广场的确好大好多秘道,地形上实在几难追击,要截停林郑实在唔容易,但我地讲到尾都唔系为追而追,接近40个学民仔,连埋大专政关同埋青年重夺未来既战友,纯粹想亲手将请愿信交比林郑,希望佢学识正视学生既声音同埋诉求,但就系都估唔到几百个警察要重重包围我地,仲要用只手举高枝胡椒喷雾好似差啲想喷落泥,真系夸张得好人惊。
    
    行动开始之际,我地尝试想有秩序乖乖地排队入场,即使抽唔中都好,都睇下有无得后补walk-in入场,如果你有10张空椅,咁我地咪10个人入场,如果主办单位有60张空椅,我地咪全部人一齐入场,如此类推。但真系出乎意料之外,正当入到场嗰几位学民既朋友,whatsapp send左张场内好多空椅既相过泥,我满心以为入到场既机会好大,但青年事务委员会就派左个工作人员泥讲到明:「宁愿满场空椅 都不许青年后补进场」,而果啲空椅就比啲根本唔系青年既中年叔伯坐咗。
    
    之后眼见无后补机制就算啦,咪叫本身抽中左既同学入场先,学民思潮有位麦同学(最后被抽中发言嗰位)一手拎住张写住「重启政改」既A4纸,另一手拎住入场许可证(即系封电邮)想入去,个保安居然同佢讲「拎住依张纸唔入得场」,先唔好讲封电邮根本无讲到有审查制度,而系点解有依四只字就唔入得场?咁系咪所有同政府立场唔同既字句都唔带得入场?净系写住「二零一七 机不可失」撑政府立场既字句先入得场?咁系咪代表左政府有筛选?最后经过多番争论,为左唔好搞到迟到,麦同学将张示威标语交比我,先勉为其难入到场。
    
    后来发生一件更加离谱既事,就系无啦啦有个11岁(唔系5岁)既小朋友加入左我地既游行队伍,我地就请佢过嚟讲几句,交待下点解自已着住校服都同班哥哥姐姐示威,喺佢拎住枝咪带住我地一齐嗌「我要真普选」、「废除功能组别」同埋「撤回人大决定」之后,黄浩铭怪叔叔问佢点解会喺度,之后佢就话自已住柴湾,平时每日放学后都会去青年广场六楼自修室做功课,但系唔知点解今日班警察阻住佢,唔比佢上去做功课,讲讲下就搞到喊咗出嚟,喊住咁同啲警察讲:「我想上去做功课我未做完功课唔返得屋企呜呜」最后有几个好善良而本身示紧威既哥哥姐姐就安慰佢,经多番转折之后先上得返去做功课。
    
    发生三件事都真系好难以接受,根本证明政府「口讲一套 实际一套」,讲就话接纳你既意见,点知有空椅都唔比年轻人入埋嚟,有政府唔LIKE既标语就唔入得场,同埋小朋友都好惨咁比警察不合理对待,其实我地做咁多野唔系为好遥不可及既诉求,不过系想亲身质问林郑,到底点解用「无基础」为由,拒绝同学民思潮进行公开对话,即使大家立场唔同,但坐底好好咁交流观点,「有商有量 有说有笑」唔系政府最钟意讲既口头禅咩?
    
    点都好,今日落区追击行动只系前奏,一日政府官员仲会落区,一日都会有学民思潮落嚟迎接你,我地就系要政府明白,抗争既声音虽然入唔到场,但「眼不见为净」既处事心态只系引火自焚,你地最终都系难逃抗争者既怒火,我地唔甘心比你既政治公关技俩招摇撞骗,街头必然系一个战场,让学生掀开权贵官僚既不公不义。
    
    来源:香港独立媒体

(此为打印板,原文网址:
http://news.boxun.com/news/gb/pubvp/2015/02/201502110208.shtml)


博讯是畅所欲言的场所、所有文章均不一定代表博讯立场